شعر
المحاسب / محمد محمود عبدالفتاح
******************
رحت المقابر
لجل ازور امى وابويه
كنت ملهى ف دنيتى
ومزرتهمش من زمان
فتحت باب المقبره
وجبت دكه من الخشب
وقعدت وحدى ف المكان
مكنش فيه صريخ بينطق
الا طير عمال يزقزق
واما شافنى جاى
هرب
وطلع
وقف فوق الحيطان
وقعد يبحلق من بعيد
كأنو بيقول
انتا مين
وجاى ليه
دا الموجدين بات امرهم ف حكم كان
مات الغنى
ومات الفقير
والعمده نام جنب الغفير
والكل كان وجبه هنيه للديدان
اقرا أسامى الموجدين
اللى ف قبورهم مسجونين
من كام سنه
كانوا بشر متعنطظين
على الضعيف مستقويين
ناسيين هنا
كانوا يقولوا للغريب
انتا متعرفش احنا مين
الباشا من عيلة سعيد
ودول جعوبه مشهورين
وده زواوى
وده قناوى
ودول خضاروه معروفين
وده مغازى
ودا شهاينى
ودول خدادشه مأصلين
هأ
هأ
هأهأ
هأ
الكل فين دلوقت يا زاير المكان
الدنيا غرتهم
ونستهم
وخلتهم يتوهوا فى الزحام
لحد ملك الموت م جه مسك الزمام
وشوه الوش الجميل
اللحم داب
والعظم بان
وحطم القد اللى كان ولا غصن بان
وف النهايه
اوعا يوم تنسا النهايه
دى البدايه بتبتدى وقت النهايه
قال نصيحته الغاليه ليه وتنو طاير
قلت هاكتبها ف شعرى تحت اسم
نصيحه غاليه قالها لى طير المقابر